गड़बड़ थाणा

चा आले खसम की थाने पै उधारी घणी सै, अर थाने आला पै उधार मैं पीण की लाचारी घणी सै, चाला तो नु पाटग्या के चा आला उधार चा प्याण नै नाटग्या। होलदारा की क्यूकर मिट्ठी होंगी जाड़.. के हो ज्यावैगा चाय का जुगाड़ वो तो एपिसोड देखकै ए बेरा पाट्टैगा।

होलदारा नै थाने मैं आण नै होज्या सै वार, इतने मै ए छोह मै आग्या थानेदार। इब थानेदार लेवै सै होलदारा की क्लास इतने मैं ए आज्या सै थाने मैं एक बंदा खास.. नाम सै खजाना धोरै तै लगावै ना आन्ना.. होलदारा का किस बात पै रोला था अर खजाना अपना कुणसा कमाल दिखावै सै.. पूरा एपिसोड देक्खो जब बेरा पाटटैगा।

थानेदार साहब धोरै सै एक पुराणा स्कूटर, जो थानेदार साहब की तरियां कित्तै हो रुकज्या सै। अर यो स्कूटर भी ब्याह मैं मिल्या होड़ जै इसकै किमै होज्या तो थानेदार नै रोट्टी ना मिल्लै.. जब स्कूटर राह मैं होग्या खराब.. तो थाने मैं क्यूकर पोंहचे जनाब अर फेर आया इसा मिस्त्री.. जो लाग्या थानेदार साहब कै ए ग्रीस.. ना समझे ? .. समझोगे जब ना जब पूरा एपिसोड देक्खोगे।

आपनै रिपोर्टर तो बोहत देक्खी होंगी पर चित्रा जिसी नही जितनी भयंकर या जुबान चलावै सै उसतै भी ज्यादा खतरनाक स्कूटी चलावै सै। ईब होलदार स्कूटी नै नाक्कै पै रुकवावैगा तो के उसका चालान काट्टैगा.. या फेर किमै और.. चित्रा और उसकी ड्राईवरी की कसूती स्टोरी सै एपिसोड नंबर 4 मैं.. जल्दी जल्दी देक्खो कदे स्कूटी लिकड़ ज्या।

थाने पै होणा था इंस्पेक्शन पर होग्या इंफेक्शन.. हां इसा इंफेक्शन जिसतै सारे चकराए हांडै सै। दरअसल इंस्पेक्शन करण आला कमिश्नर ए किसे नै किडनेप कर लिया ईब किडनेपर कौण सै.. अर कमिश्नर साहब क्यूकर बचकै आवै सै.. यो तो तमनै पूरा एपिसोड देक्खे पाच्छै ए बेरा पाट्टैगा।

तमनै गुंडे बदमाशा मैं फलाणा भाई.. ढिमका भाई तो सुणा होगा.. पर कदे बाहण सुणी सै.. ना नै.. तो सुणियो भी अर देखियो भी अपने एरिये की बड्डी बदमाश बबली बाहण.. जिसनै बबली डॉन भी कह दिया करै, मुकाबला सै पुलिस का और बबली डॉन का.. ईब पुलिस बबली नै पकड़ पावैगी.. या बबली पुलिस का ए बेवकूफ बणावैगी.. इस एपिसोड नै देक्खो सारी कहाणी बेरा पाटज्यावैगी।

थानेदार की मैडम नै मनाणा सै रक्षाबंधन, पर थानेदार साहब नै करणी सै अपनी ड्यूटी सिपाही होलदार सब मना रे सैं यो त्यौहार पर के थानेदार साहब का भी मना बंधवा पावैगा राखी.. अर त्यौहार पै आण जाण वाला नै नाक्के आले क्यूकर सम्हालैंगें.. देक्खो इस एपिसोड मैं के किसका खर्चा होवैगा अर किसका चालान कट्टैगा।