प्यार सुवाद अनुसार (हरियाणवी)

अमीर घर का बेटा राहुल अमरीका तै पढ़ाई करकै आवै सै। उसका बाबु सोचै सै अक उसका बेटा उसका सारा बिजनेस संभाळ लेगा पर राहुल की सोच कुछ और ऐ सै। दूसरी औड़ स्नेहा थोड़े गरम स्वभाव की सै । बात बात पै नौकरानी नै भी धमका दे सै। इस एपिसोड म्ह थम दोनुआं की दिनचर्या अर स्वभाव देखोगे।

राहुल दुनिया के सबतै बड़े शैफ धोरै काम सिखण जावै है पर उडै उसकी बात ना बणती। स्नेहा नै अपणे घर म्ह किसे शैफ की करड़ी जरूरत पडज्या सै फेर उसकी मुलाकात राहुल गैल होवै है। किसी रवैगी दोनुआं की पहली मुलाकात?

स्नेहा के खाणै नै ग्राहक बढ़िया ना बतांदे अर राहुल के खाणै नै बढ़िया बतावै हैं। गुस्सै म्ह आई स्नेहा की राहुल गैल हौड़ लागज्या है के कुणसा बढ़िया खाणा बणावै है। दोनूं एक ऐ डिश बणावै हैं। इब देखो किसका खाणा सबतै बढ़िया है? कौण जीतैगा यो मुकाबला?

रेस्टोरैंट म्ह एक ग्राहक खाणा खाकै बेहोंश होज्या सै अर बात इतणी बढ़ज्या सै के उसनै अस्पताळ लेकै जाणा पड़ै है। मीडिया लग या बात फैलज्या है के उसनै इस रेस्टोरैंट म्ह किमे गलत खवाया गया है। इसा के गलत परोंसकै दिया गया उनके खाणै म्ह? क्युकर लिकडैंगे राहुल अर स्नेहा इस मुश्किल तै बाहर?

इस ऐपिसोड म्ह स्नेहा का स्वभाव बार-बार बदलै है। कदे राहुल नै देखकै नरम होज्या सै तो कदे उसनै उसकी फिमेल दोस्तां तै मिलदा देख छो आण लागज्या है। क्युं बदलण लाग रया है गुस्सैल स्नेहा का स्वभाव? किस द्वंद्व म्ह फसगी स्नेहा? अर के है इसके पीछै का राज़? देखो

राहुल स्नेहा नै इग्नोर करण लाग रया है अर स्नेहा नै इस बात की चिंता होज्या है पर दुखी होकै वा राहुल का रास्ता रोक ले है अर अपणे मन की सारी बात बता दे है। इब राहुल के जवाब देगा स्नेहा नै? इब उनके प्यार की शुरूआत होगी या अंत?

प्यार तो होग्या पर इब इनके भविष्य का के? नई-नई डिश बणाण के चक्कर म्ह राहुल नै ग्राहकां का गुस्सा भुगतणा पड़ै है। स्नेहा अपणे रेस्टोरैंट की घटती रेटिंग तै परेशान सै। के इब इन दोनुआं की रसोई आळा प्यार ग्राहकां की जीभ पै स्वाद बिठा पावैगा?

राहुल का सच स्नेहा के बाबू नै बेरा पाटज्या सै अर वे उसनै घर तै लिकड़ण की कह दे हैं। राहुल सफाई देण की कोशिश करै है पर स्नेहा के पापा उसकी बात सुनण तै मना करदे हैं। आखिर इसा के राज था राहुल का? के टूट जागा स्नेहा अर राहुल का रिश्ता?

इतणा सब होण के बाद‌ भी राहुल हार नही मान रया। वो अपणा नाम खाणा बणाण के नैशनल कम्पीटिशन म्ह लिखवा दे सै। देखो ये 48 घंटे इब राहुल के किसे बीतैंगे? वो जीतैगा यो कम्पीटिशन या हार जागा? के स्नेहा उसनै मिल पावैगी या नही?