किसान पुत्र

क्षितिज एक गरीब किसान आंनदराव का बेटा है, इसा किसान जो कर्ज़ै म्ह डूब रया है अर बेटै की नौकरी की बाट देखै है। एक साल बाद क्षितिज ऑफर लैटर गैल आवै है घरनै, पर फसल बेचण मंडी म्ह गए उसके बाबू गैल गुंड़े बदसलूकी करै हैं। के करैगा क्षितिज इब?

छो म्ह आया क्षितिज मंडी म्ह आज्या है अर गुंड्यां कै मारकै फसल का दाम घरनै पुंचाण की कवै है। उनका मालिक बहोत खतरनाक है इस डर तै उसका बाबू उसनै रपिए देकै हैदराबाद जाण की कह दे है। के क्षितिज चला जागा हैदराबाद?

क्षितिज का ऑफिस का पहला दिन बढ़िया ना जाता। किसानां के बारै म्ह उसके सहकर्मियां के विचार उसका मुड बिगाड़ दे हैं। कुछ दिन बाद उसके हाथ तै एक महत्तवपूर्ण फाईल गायब होज्या है। के इब क्षितिज लिकाड़ दिया जागा ऑफिस तै? के दुबारा उसनै घरनै आकै खेती करणी पड़ैगी?

क्षितिज नै बेरा पटै है वा फाईल जाण बुझकै गायब करी गई थी। उरै क्षितिज अपणे दोस्तां गैल डिलिट होई फाईल दुबारा बणा देण की खुशी म्ह पार्टी करै है। आखिर किसनै रची थी फाईल डिलिट करण की साज़िश?

तारा गायब है! क्षितिज उसनै बचाण खात्तर बाईक रेस लगावै है। के बचा पावैगा क्षितिज तारा नै? दूसरी औड़ राधा बुरी हालत म्ह अचानक क्षितिज के कमरै म्ह आज्या है जड़ै वो तारा गैल होवै है। राधा की हालत बुरी क्युं है?

आनंदराव यानी क्षितिज के बाबू के खेतां म्ह आग लागज्या है अर उनकी तबियत बिगड़ ज्या है। आखिर किसनै लगाई आग? के इब यो स्वाभिमानी किसान आत्महत्या कर लेगा?

आंनदराव अस्पताळ म्ह दाखिल होवै है अर क्षितिज उनकी कर्ज़ै आळी कापी पढ़ै है। कर्ज़ै की रकम देखकै वो अपणे बाबू खात्तर बहोत रोवै है। नायडू के गुंडाराज नै खत्म करण खात्तर क्षितिज एक कदम उठावै है। आखिर के है वो कदम?

क्षितिज तारा नै बतादे है के वो राधा‌ तै प्यार करै है। दूसरी कानी नायडू क्षितिज नै मरवाण की धमकी दे दे है। के नायडू कामयाब हो पावैगा अपणी साज़िश म्ह?

क्षितिज किसानां नै आधुनिक खेती समझावै है गैल की गैल उनतै खाद-बीज खात्तर चंदा कट्ठा करण की कह है ताकि उननै किसे पै निर्भर ना होणा पड़ै। जब क्षितिज का राधा गैल ब्यांह होण आळा हो है तो एक अनहोनी होज्या है। के हो पावैगी राधा अर क्षितिज की शादी?

पुलिस क्षितिज नै धौखाधड़ी के चक्कर म्ह पकड़ ले है अर नायडू धोरै ले आवै हैं। नायडू एक आदमी नै क्षितिज तयी मारण खात्तर ब्लैकमेल करै है। के किसान पुत्र क्षितिज क्रांति ल्याण तै पहल्या मर जागा?